0:00
/
1ܗ̇ܝܓܵܗ ܦܝܼܠܵܛܘܿܣ ܕܒܸܩܠܹܗ ܘܓ̰ܘܼܢܓ̰ܸܪܹܐ ܠܝܼܫܘܿܥ. 2ܘܣܲܪ̈ܒܵܙܹܐ ܓܕܸܠܗܘܿܢ ܟܠܝܼܠܵܐ ܡ̣ܢ ܟܸܬܘܹ̈ܐ: ܘܡܘܼܬܸܒ̣ܠܗܘܿܢ ܒܪܹܫܹܗ: ܘܡܘܼܠܒܸܫܠܗܘܿܢ ܐܸܠܹܗ ܓ̰ܘܼܠܵܐ ܣܡܘܼܩܵܐ. 3ܘܐ݇ܬܹܐܠܗܘܿܢ ܩܵܕَܡܘܼܗܝ ܘܐَܡܸܪܗܘܿܢ: ܫܠܵܡܵܐ ܠܘܼܟܼ: ܡܲܠܟܵܐ ܕܝܗَܘܼܕܵܝܹ̈ܐ. ܘܡܵܚܝܼ ܗ݇ܘܵܘ ܠܹܗ ܥܲܠ ܦܵܬܹܗ. 4ܘܦܠܸܛܠܹܗ ܦܝܼܠܵܛܘܿܣ ܡܸܢَܕܪܸܫَ ܠܒܲܕܲܪ: ܘܐَܡܝܼܪܹܗ ܐܸܠܵܝܗܝ: ܗܵܐ: ܦܵܠܛܸܢܹܗ ܠܟܸܣܠܵܘܟ̣ܘܿܢ ܠܒܲܕܲܪ: ܕܝܵܕܥܝܼܬܘܿܢ ܕܠܹܐ ܝܘܸܢ ܡܵܫَܟ̰ܘܼܚܹܐ ܒܝܹܗ ܐܘܿܦ ܠܵܐ ܚܕܵܐ ܗܲܓ̰ܲܬ. 5ܘܦܠܸܛܠܹܗ ܝܼܫܘܿܥ ܠܒܲܕܲܪ ܟܲܕ ܐܝܼܬ ܗ݇ܘܵܐ ܥܲܠܘܼܗܝ ܟܠܝܼܠܵܐ ܕܟܸܬܘܹ̈ܐ ܘܓ̰ܘܼܠܵܐ ܕܐܲܪܓܘܵܢܵܐ: ܘܐَܡܝܼܪܹܗ ܐܸܠܵܝܗܝ: ܗܵܐ: ܐ݇ܢܵܫܵܐ. 6ܟܲܕ ܗܲܕܟ̣ܵܐ ܚܙܹܐܠܗܘܿܢ ܐܸܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܦܲܪ̈ܵܫܹܐ: ܡܘܼܩܘܸܚܠܗܘܿܢ ܘܐܵܡܪܝܼ: ܙܩܘܿܦ ܠܹܗ: ܙܩܘܿܦ ܠܹܗ. ܐܵܡܸܪ ܐܸܠܵܝܗܝ ܦܝܼܠܵܛܘܿܣ: ܠܵܒܠܗܘܿܢ ܐܲܚܬܘܿܢ ܘܙܩܘܿܦܘܿܢ ܠܹܗ: ܣܵܒܵܒ ܐܵܢܵܐ ܠܹܐ ܝܘܸܢ ܡܵܫَܟ̰ܘܿܚܹܐ ܒܝܹܗ ܗܲܓ̰ܲܬ. 7ܓ̰ܘܼܘܸܒܠܗܘܿܢ ܐܸܠܹܗ ܝܗَܘܼܕܵܝܹ̈ܐ: ܐܲܚܢܲܢ ܐܝܼܬ ܠܲܢ ܢܵܡܘܿܣܵܐ: ܘܐܲܝܟܼ ܕܒܢܵܡܘܿܣܲܢ ܓܘܼܢܵܗܟܵܪ ܝܼܠܹܗ ܠܡܵܘܬܵܐ: ܕܥܒ̣ܝܼܕܵܠܹܗ ܓܵܢܹܗ ܒܪܘܿܢܹܗ ܕܐܲܠܵܗܵܐ. 8ܟܲܕ ܫܡܸܥܠܹܗ ܗܲܕܟ̣ܵܐ ܦܝܼܠܵܛܘܿܣ ܐܵܗܵܐ ܗܹܡܸܙܡܵܢ: ܙܵܘܕܵܐ ܙܕܸܥܠܹܗ. 9ܘܥܒܼܸܪܹܗ ܡܸܢَܕܪܸܫَ ܠܦܪܵܛܘܿܪܝܼܢ: ܘܐَܡܝܼܪܹܗ ܠܝܼܫܘܿܥ: ܡܐܲܝܟܵܐ ܝܘܸܬ: ܐܝܼܢܵܐ ܝܼܫܘܿܥ ܓ̰ܘܼܘܵܒ ܠܵܐ ܝܘܼܗَܒܼܸܠܹܗ ܐܸܠܹܗ. 10ܐܵܡܸܪ ܐܸܠܹܗ ܦܝܼܠܵܛܘܿܣ: ܥܲܡܝܼ ܠܹܐ ܝܘܸܬ ܗܲܡܙܘܼܡܹܐ: ܠܹܐ ܝܘܸܬ ܒܝܼܕܵܥܝܵܐ ܕܐܵܢܵܐ ܐܝܼܬ ܠܝܼ ܗܘܼܟܡܵܐ ܕܫܵܪܸܢܘܼܟ: ܘܐܝܼܬ ܠܝܼ ܗܘܼܟܡܵܐ ܕܙܵܩܦܸܢܘܿܟ. 11ܓ̰ܘܼܘܸܒܠܹܗ ܝܼܫܘܿܥ: ܠܲܝܬ ܗ݇ܘܵܐ ܠܘܼܟܼ ܥܲܠܝܼ ܗܘܼܟܡܵܐ: ܠܵܐ ܗܸܟ̃: ܐܸܢ ܠܹܐ ܗ݇ܘܵܐ ܝܘܼܗَܒ̣ܵܐ ܐܸܠܘܼܟܼ ܡ̣ܢ ܠܥܸܠܸܠ ܣܵܒܵܒ ܕܐܵܗܵܐ ܗ̇ܘ ܕܣܘܼܦܝܸܢܹܗ ܒܝܼܘܼܟ ܒܘܼܫ ܓܘܼܪܬܵܐ ܝ݇ܠܵܗ̇ ܚܛܝܼܬܹܗ. 12ܡ̣ܢ ܕܐܵܗܵܐ ܒܵܥܝܹܐ ܗ݇ܘܵܐ ܦܝܼܠܵܛܘܿܣ ܕܫܵܪܹܐ ܠܹܗ. ܐܝܼܢܵܐ ܝܗَܘܼܕܵܝܹ̈ܐ ܡܲܩܘܸܚܝܼ ܗ݇ܘܵܘ ܘܐܵܡܪܝܼ: ܐܸܢ ܠܐܵܗܵܐ ܫܵܪܸܬ: ܠܹܐ ܝܘܸܬ ܕܵܘܣܬܹܗ ܕܩܹܣܲܪ: ܣܵܒܵܒ ܟܠ ܡ̇ܢ ܕܓܵܢܹܗ ܥܵܒܸܕ ܡܲܠܟܵܐ: ܕܲܪܩܘܼܒ̣ܠ ܕܩܹܣܲܪ ܝܼܠܹܗ. 13ܟܲܕ ܫܡܸܥܠܹܗ ܦܝܼܠܵܛܘܿܣ ܐܲܢܹܐ ܗܹܡܸܙܡܵܢܹ̈ܐ: ܦܘܼܠܸܛܠܹܗ ܠܝܼܫܘܿܥ ܠܒܲܕܲܪ: ܘܝܬܸܒ̣ܠܹܗ ܥܲܠ ܟܘܼܪܣܝܵܐ ܕܕܝܼܘܵܢ: ܒܕܘܼܟܬܵܐ ܕܦܵܝܫܵܐ ܗ݇ܘܵܐ ܩܪܝܼܬܵܐ: ܪܨܝܼܦܬܵܐ ܕܟܹܐܦܹ̈ܐ: ܐܝܼܢܵܐ ܒܠܸܫܵܢܵܐ ܕܥܸܒ̣ܪ̈ܵܝܹܐ: ܓܦܝܼܦܬܵܐ. 14 ܗܵܕܲܪܬܵܐ ܕܦܸܨܚܵܐ ܗ݇ܘܵܐ: ܘܐܲܝܟܼ ܣܵܥܲܬ ܕܐܸܫܸܬ: ܘܐَܡܝܼܪܹܗ ܠܝܗَܘܼܕܵܝܹ̈ܐ: ܗܵܐ: ܡܲܠܟܵܘܟ̣ܘܿܢ. 15ܐܝܼܢܵܐ ܐܵܢܝܼ ܡܲܩܘܸܚܝܼ ܗ݇ܘܵܘ: ܫܩܘܿܠ ܠܹܗ: ܫܩܘܿܠ ܠܹܗ: ܙܩܘܿܦ ܠܹܗ. ܐܵܡܸܪ ܐܸܠܵܝܗܝ ܦܝܼܠܵܛܘܿܣ: ܠܡܲܠܟܵܘܟ̣ܘܿܢ ܙܵܩܦܸܢ: ܓ̰ܘܼܘܸܒܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ: ܠܲܝܬ ܠܲܢ ܡܲܠܟܵܐ ܫܒ̣ܘܿܩ ܡ̣ܢ ܩܹܣܲܪ. 16ܗ̇ܝܓܵܗ ܣܘܼܦܹܠܹܗ ܒܝܼܵܝܗܝ ܕܙܵܩܦܝܼ ܠܹܗ. ܘܠܘܼܒܸܠܗܘܿܢ ܠܝܼܫܘܿܥ: ܘܦܘܼܠܸܛܠܗܘܿܢ ܐܸܠܹܗ. 17ܟܲܕ ܫܩܝܼܠܵܐ ܙܩܝܼܦܹܗ ܦܠܸܛܠܹܗ ܠܕܘܼܟܬܵܐ ܕܦܵܝܫܵܐ ܗ݇ܘܵܐ ܩܪܝܼܬܵܐ ܕܘܼܟܬܵܐ ܕܩܲܪܩܲܦܬܵܐ: ܐܝܼܢܵܐ ܒܠܸܫܵܢܵܐ ܕܥܸܒ̣ܪ̈ܵܝܹܐ ܟܹܐ ܦܵܝܫܵܐ ܐܡܝܼܪܬܵܐ: ܓܘܿܠܓܘܿܬܵܐ. 18ܐܲܝܟܵܐ ܕܩܲܡ ܙܵܩܦܝܼ ܠܹܗ: ܘܥܲܡܹܗ ܬܪܹܝ ܐ݇ܚܹܪ̈݇ܢܹܐ: ܚܲܕَ ܡܐܵܗܵܐ ܓܹܒܵܐ ܘܚܲܕَ ܡܗ̇ܘ ܓܹܒܵܐ: ܘܠܝܼܫܘܿܥ ܒܒܹܝܦܲܠܓܵܐ. 19ܘܟܬܸܒ̣ܠܹܗ ܐܘܼܦ ܠܘܼܚܵܐ ܦܝܼܠܵܛܘܿܣ: ܘܡܘܼܬܒ̣ܵܠܹܗ ܥܲܠ ܙܩܝܼܦܹܗ: ܘܟܬܝܼܒ̣ܵܐ ܗ݇ܘܵܐ: ܝܫܘܥ ܢܨܪܝܐ ܡܠܟܐ ܕܝܗَܘܼܕܝ̈ܐ. 20ܘܠܵܐܗܵܐ ܕܲܦܵܐ ܪܵܒܵܐ ܡ̣ܢ ܝܗَܘܼܕܵܝܹ̈ܐ ܩܪܹܐܠܗܘܿܢ: ܣܵܒܵܒ ܕܩܘܼܪܒܵܐ ܗ݇ܘܵܐ ܠܡܕܝܼܢَܬܵܐ ܗ̇ܝ ܕܘܼܟܬܵܐ ܕܦܸܫܠܹܗ ܙܩܝܼܦܵܐ ܒܝܼܵܗ̇ ܝܼܫܘܿܥ. ܘܟܬܝܼܒ̣ܵܐ ܗ݇ܘܵܐ ܒܠܸܫܵܢܵܐ ܕܥܸܒ̣ܪ̈ܵܝܹܐ: ܘܕܝܵܘܢܵܝܹ̈ܐ: ܘܕܪ̈ܗَܘܿܡܵܝܹܐ. 21ܘܐَܡܸܪܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܕܝܗَܘܼܕܵܝܹ̈ܐ ܠܦܝܼܠܵܛܘܿܣ: ܠܵܐ ܟܵܬܒܸܬ ܡܲܠܟܵܐ ܕܝܗَܘܼܕܵܝܹ̈ܐ: ܐܸܠܵܐ ܕܗ̇ܘ ܐَܡܝܼܪܹܗ: ܡܲܠܟܵܐ ܕܝܗَܘܼܕܵܝܹ̈ܐ ܝܘܸܢ. 22ܓ̰ܘܼܘܸܒܠܹܗ ܦܝܼܠܵܛܘܿܣ: ܡܸܢܕܝܼ ܕܟܬܸܒ̣ܠܝܼ ܟܬܸܒ̣ܠܝܼ. 23ܐܝܼܢܵܐ ܣܲܪ̈ܒܵܙܹܐ ܟܲܕ ܙܩܸܦܠܗܘܿܢ ܠܝܼܫܘܿܥ: ܫܩܸܠܗܘܿܢ ܓ̰ܘܼܠܘܼ̈ܗܝ ܥܒܸܕܠܗܘܿܢ ܠܐܲܪܒܥܵܐ ܣܵܡܹ̈ܐ: ܠܟܠ ܚܲܕَ ܡ̣ܢ ܣܲܪ̈ܒܵܙܹܐ: ܐܘܼܦ ܨܘܼܕܪܹܗ ܐܝܼܢܵܐ ܨܘܼܕܪܹܗ ܠܹܐ ܗ݇ܘܵܐ ܚܝܼܛܬܵܐ: ܡ̣ܢ ܠܥܸܠܸܠ ܙܩܝܼܪܬܵܐ ܗ݇ܘܵܐ ܟܠܵܗ̇. 24ܘܐَܡܸܪܗܘܿܢ ܚܲܕَ ܠܗ̇ܘ ܐܚܹܪ̈ܢܵܐ: ܠܵܐ ܟ̰ܲܢܟ̰ܸܪܵܚ ܠܵܗ̇: ܐܸܠܵܐ ܕܵܪܵܚ ܥܲܠܘܼܗܝ ܦܸܫܟܵܐ: ܕܡܵܢܝܼ ܗܵܘܝܵܐ: ܕܦܵܐܹܫ ܬܘܼܡܸܡܵܐ ܟܬܵܒ̣ܵܐ ܕܐَܡܝܼܪܹܗ: ܦܘܼܠܹܠܗܘܿܢ ܓ̰ܘܼܠܝܼ̈ ܒܹܝܠܵܝܗܝ: ܘܥܲܠ ܠܒܸܫܬܝܼ ܕܪܹܠܗܘܿܢ ܦܸܫܟܵܐ. 25ܐܲܢܹܐ ܗܲܕܟ̣ܵܐ ܥܒܸܕܠܗܘܿܢ ܣܲܪ̈ܒܵܙܹܐ. ܐܝܼܢܵܐ ܟܸܠܝܹܐ ܗ݇ܘܵܘ ܠܟܸܣ ܙܩܝܼܦܹܗ ܕܝܼܫܘܿܥ ܝܸܡܹܗ: ܘܚܵܬܵܗ̇ ܕܝܸܡܹܗ: ܡܲܪܝܲܡ ܗ̇ܝ ܕܩܲܠܝܘܿܦܵܐ: ܘܡܲܪܝܲܡ ܡܲܓ̣ܕܠܵܝܬܵܐ. 26ܘܝܼܫܘܿܥ ܟܲܕ ܚܸܙܝܵܠܹܗ ܠܝܸܡܹܗ: ܘܠܗ̇ܘ ܬܲܠܡܝܼܕܵܐ ܕܟܹܐ ܡܲܚܸܒ ܗ݇ܘܵܐ ܟܸܠܝܵܐ: ܐَܡܝܼܪܹܗ ܠܝܸܡܹܗ: ܒܲܟ̣ܬܵܐ: ܗܵܐ: ܒܪܘܼܢܵܟ̣ܝ. 27ܘܐَܡܝܼܪܹܗ ܠܗ̇ܘ ܬܲܠܡܝܼܕܵܐ: ܗܵܐ: ܝܸܡܘܼܟ! ܘܡܗ̇ܝ ܣܵܥܲܬ ܠܘܼܒܠܵܠܹܗ ܗ̇ܘ ܬܲܠܡܝܼܕܵܐ ܠܟܸܣܠܹܗ. 28ܒܵܬَܪ ܐܲܢܹܐ: ܟܲܕ ܝܕܸܥܠܹܗ ܝܼܫܘܿܥ ܕܟܠ ܡܸܢܕܝܼ ܦܸܫܠܹܗ ܬܘܼܡܸܡܵܐ: ܕܦܵܐܹܫ ܗ݇ܘܵܐ ܬܘܼܡܸܡܵܐ ܟܬܵܒ̣ܵܐ: ܐَܡܝܼܪܹܗ: ܨܗَܝܵܐ ܝܘܸܢ. 29ܘܡܵܐܢܵܐ ܡܘܼܬܒ̣ܵܐ ܗ݇ܘܵܐ ܡܸܠܝܵܐ ܚܵܠܵܐ: ܘܐܵܢܝܼ ܡܠܹܠܗܘܿܢ ܐܸܣܦܘܼܓܵܐ ܡ̣ܢ ܚܵܠܵܐ: ܘܡܘܼܬܸܒ̣ܠܗܘܿܢ ܥܲܠ ܙܘܿܦܵܐ: ܘܡܘܼܬَܝܹܠܗܘܿܢ ܠܟܸܣ ܦܘܼܡܹܗ. 30ܐܝܼܢܵܐ ܟܲܕ ܫܩܸܠܹܗ ܚܵܠܵܐ ܝܼܫܘܿܥ: ܐَܡܝܼܪܹܗ: ܬܘܼܡܸܡܵܐ ܝܠܹܗ. ܘܡܘܼܟܸܦܠܹܗ ܪܹܫܹܗ: ܘܣܘܼܦܝܵܠܹܗ ܪܘܼܚܹܗ. 31ܐܝܼܢܵܐ ܝܗَܘܼܕܵܝܹ̈ܐ: ܣܵܒܵܒ ܕܗܵܕܲܪܬܵܐ ܗ݇ܘܵܐ: ܕܠܵܐ ܦܵܝܫܝ ܒܫܲܒܬܵܐ ܐܲܢܹܐ ܦܲܓ̣ܪܹ̈ܐ ܥܲܠ ܙܩܝܼܦܹ̈ܐ: ܣܵܒܵܒ ܝܵܘܡܵܐ ܓܘܼܪܵܐ ܗ݇ܘܵܐ ܝܵܘܡܵܐ ܕܗ̇ܝ ܫܲܒܬܵܐ: ܒܥܹܐܠܗܘܿܢ ܡ̣ܢ ܦܝܼܠܵܛܘܿܣ ܕܦܵܝܫܝܼ ܬܒ̣ܝܼܪܹܐ ܫܵܩܵܢܵܝ̈ܗܝ: ܘܕܦܵܝܫܝܼ ܡܘܼܨܠܝܹܐ. 32ܘܐ݇ܬܹܐܠܗܘܿܢ ܣܲܪ̈ܒܵܙܹܐ ܘܬܒܸܪܗܘܿܢ ܫܵܩܵܢܹ̈ܐ ܕܩܵܕَܡܵܝܵܐ: ܘܕܗ̇ܘ ܐ݇ܚܹܪ݇ܢܵܐ ܕܦܸܫܠܹܗ ܙܩܝܼܦܵܐ ܥܲܡܹܗ. 33ܐܝܼܢܵܐ ܟܲܕ ܐ݇ܬܹܐܠܗܘܿܢ ܠܟܸܣ ܝܼܫܘܿܥ: ܚܙܹܐܠܗܘܿܢ ܕܡܝܼܬܵܐ ܗ݇ܘܵܐ ܡ̣ܢ ܓ̰ܲܠܕܹܐ: ܠܵܐ ܬܒܸܪܗܘܿܢ ܫܵܩܵܢܘܼ̈ܗܝ. 34ܐܸܠܵܐ ܚܲܕَ ܡ̣ܢ ܣܲܪ̈ܒܙܹܐ ܡܚܹܠܹܗ ܒܕܸܦܢܹܗ ܒܪܘܼܡܚܵܐ؛ ܘܕܲܪܣܵܥܲܬ ܦܠܸܛܠܹܗ ܕܸܡܵܐ ܘܡ̈ܝܼܵܐ. ܘܗ̇ܘ ܕܚܙܹܐܠܹܗ ܝܘܼܗَܒܼܸܠܹܗ ܣܵܗܕܘܼܬܵܐ: ܘܣܲܪܲܣܬ ܝ݇ܠܵܗ̇ ܣܵܗܕܘܼܬܹܗ. 35ܘܗ̇ܘ ܒܝܼܕܵܥܝܵܐ ܝܠܹܗ ܕܣܲܪܲܣܬ ܒܹܐܡܵܪܵܐ ܝܠܹܗ: ܕܐܘܼܦ ܐܲܚܬܘܿܢ ܗܲܡܸܢܝܼܬܘܿܢ. 36ܣܵܒܵܒ ܐܲܢܹܐ ܗَܘܹܐܠܗَܘܿܢ ܕܦܵܐܹܫ ܬܘܼܡܸܡܵܐ ܟܬܵܒ̣ܵܐ: ܓܲܪܡܵܐ ܠܹܐ ܦܵܐܹܫ ܬܒ̣ܝܼܪܵܐ ܒܝܹܗ. 37ܘܡܸܢَܕܪܸܫَ ܟܬܵܒ̣ܵܐ ܐ݇ܚܹܪ݇ܢܵܐ ܐَܡܝܼܪܹܗ: ܒܸܬ ܚܵܝܪܝܼ ܒܗ̇ܘ ܕܟ̰ܪܸܙܠܗܘܿܢ. 38ܘܒܵܬَܪ ܐܲܢܹܐ ܝܵܘܣܸܦ ܕܡ̣ܢ ܪܵܡܬܵܐ: ܕܬܲܠܡܝܼܕܵܐ ܕܝܼܫܘܿܥ ܗ݇ܘܵܐ: ܐܝܼܢܵܐ ܒܛܸܫܘܵܐ ܡ̣ܢ ܙܕܘܿܥܬܵܐ ܕܝܗَܘܼܕܵܝܹ̈ܐ: ܛܠܸܒܠܹܗ ܡ̣ܢ ܦܝܼܠܵܛܘܿܣ ܕܫܵܩܸܠ ܗ݇ܘܵܐ ܦܲܓ̣ܪܹܗ ܕܝܼܫܘܿܥ. ܘܝܘܼܗَܒܼܸܠܹܗ ܕܲܣܬܘܼܪ ܦܝܼܠܵܛܘܿܣ ܗܲܕܟ̣ܵܐ ܐَܬܹܐܠܹܗ ܘܠܘܼܒܸܠܹܗ ܦܲܓ̣ܪܹܗ. 39ܘܐَܬܹܐܠܹܗ ܐܘܼܦ ܢܝܼܩܵܕܹܡܘܿܣ: ܗ̇ܘ ܕܐܬܝܼܵܐ ܗ݇ܘܵܐ ܩܵܕَܡܵܝܬܵܐ ܠܟܸܣ ܝܼܫܘܿܥ ܒܠܲܝܠܹܐ: ܘܡܘܼܬَܝܠܹܗ ܥܲܡܹܗ ܡܙܵܓ̣ܬܵܐ ܕܡܘܼܪܵܐ ܘܕܥܸܠܘܲܝ ܐܲܝܟܼ ܡܵܐܐ ܠܝܼܛܪ̈ܝܼܢ. 40ܘܫܩܸܠܗܘܿܢ ܠܦܲܓ̣ܪܹܗ ܕܝܼܫܘܿܥ: ܘܩܲܡ ܟܵܪܟ̣ܝܼ ܠܹܗ ܒܟܸܬܵܢܹ̈ܐ ܘܒܒܸܣܡܹ̈ܐ: ܕܵܐܟ̣ܝܼ ܕܐܝܼܬ ܥܵܕܲܬ ܠܝܗَܘܼܕܵܝܹ̈ܐ ܕܛܵܡܪܝܼ. 41ܐܝܼܢܵܐ ܐܝܼܬ ܗ݇ܘܵܐ ܒܗ̇ܝ ܕܘܼܟܬܵܐ ܕܦܸܫܠܹܗ ܙܩܝܼܦܵܐ ܒܝܼܵܗ̇: ܓܲܢܬܵܐ: ܘܓܵܘ ܓܲܢܬܵܐ ܒܹܝܬ ܩܒ̣ܘܼܪܵܐ ܚܲܕَܬܵܐ: ܕܐ݇ܢܵܫܵܐ ܗܵܠܵܐ ܠܹܐ ܗ݇ܘܵܐ ܡܘܼܬܒ̣ܵܐ ܓܵܘܵܗ̇. 42ܘܡܘܼܬܸܒ̣ܠܗܘܿܢ ܬܵܡܵܐ ܠܝܼܫܘܿܥ: ܣܵܒܵܒ ܕܗܵܕܲܪܬܵܐ ܕܝܗَܘܼܕܵܝܹ̈ܐ: ܘܣܵܒܵܒ ܕܩܘܼܪܒܵܐ ܗ݇ܘܵܐ ܩܲܒ̣ܪܵܐ.